طلاب مقاومة

مع بداية العام الدراسى الجديد فوجىء طلبة و طالبات جامعة حلوان بقرار غريب شمل معظم الكليات و يظهر كدة ان رئيس الجامعة الجديد الدكتور عبدالله بركات كان عايز يكون اليوم الدراسى الأول يوم ما يتنسيش من ذاكرة الطلبة , فا غالبا يعنى فى أول يوم دراسى معظم الطلبة بتروح الإدارة عشان يسألوا عن مصاريف السنة الجديدة - مع إنها المفروض بتكون شبه السنة اللى قبليها بالظبط -المهم يعنى إنهم اتفاجئوا "من حيث مش عاملين حسابهم" بأن المصاريف زادت عن مصاريف السنة اللى فاتت حوالى 40% فى بعض الكليات و "الضعف" فى كليات تانية و إن ثمن مادة التخلفات زاد من 25 جنيه إلى 50 جنيه - دى تحديدا كارثة - و بالطريقة دى فعلا نجح الدكتور عبدالله بركات أنه يخلد اسمه فى زاكرة الطلبة " لأ نجم فعلا " , يعنى هو مش مكفيه العبء اللى على الأهالى نتيجة دخول الدراسة مع بداية شهر رمضان ولا مكفيه الأسعار المولعة نار برة الجامعة !!!

لــكــن" لكل فعل رد فعل " - دا قانون فى الطبيعة محدش يفتكروا مثّل - فا لما عرفنا إحنا كمان بموضوع زيادة المصاريف قررنا إننا مش هنسكت " اقصد إحنا حركة مقاومة : حركة طلابية فى جامعة حلوان " فا اتفقنا إننا قبل أى حاجة لازم نستطلع رأى الطلبة لأننا كلنا أصحاب المشكلة و فعلا عملنا استطلاع رأى سئلنا فيه الطلبة إذا كان ارتفاع المصاريف يتناسب مع دخل أسرهم أو لأ ...و كانت النتيجة أن 98% من الطلاب قالوا أن ارتفاع المصاريف لا يتناسب مع دخل أسرهم و دا شجعنا إننا نبدأ بسرعة حملتنا ضد المصاريف و فعلا بدأنا ننزل بيانات كتير بنقول فيها للطلبة إنهم يمتنعوا عن دفع المصاريف و إننا كلنا لازم نقف يد واحدة ضد الإدارة عشان نجبرها تتراجع عن قرارها دا جنب إننا كنا بندخل المدرجات و نتكلم مع الطلبة فى الموضوع و عملنا حملة توقيعات لرفض ارتفاع المصاريف و كنا بنلم التوقيعات فى المعارض اللى بنعملها " غالبا كنا بنعمل معرض كل يوم أربع قدام مدرج 10 " و كانت بجد الطلبة واقفة معانا و كنا اتفقنا معاهم إننا هنعمل وقفة احتجاجية فى وقت لاحق من الترم .....وسط كل الشغل دا جوة الجامعة عرفنا أن فى طالب فى جامعة أسيوط رفع قضية ضد إدارة الجامعة و كسبها و أخد حكم بأنه يدفع المصاريف القانونية فقط اللى هما "12 جنيه انتظام و 14 جنيه انتساب" فالمهم فى ناس مننا قابلت الطالب دا و اخدنا منه صورة الحكم و بقينا دايما بنزلها على البيانات و النشرات اللى بنعملها و بدأنا نتحرك فعليا على الجانب القانونى فا رفعنا قضية احنا كمان باسم واحد مننا و قلنا للطلبة و دعوناهم انهم يلتفوا حوالين القضية و بجد الطلبة كلها وقفت معانا و حسينا إننا خلقنا بجد حالة ماكانتش موجودة قبل كدة ...حالة ثورة !!

و الأيام عدت و إحنا بنحاول حشد أكبر عدد من الطلبة حوالين القضية " نؤكد تماما أن القضية مش هى الحل السحرى فا فى النهاية القوانين ممكن تتغير لكن اللى مش ممكن يتغير هو إرادة الناس إحنا على قد ما نقدر حاولنا نوصل لى الطلبة إن الجماهير أو الناس أيا كانت فئتهم : عمال , فلاحين , موظفين و بالتأكيد طلبة لما بيتحركوا بشكل جماعى و إرادة موحدة على مطلب معين بيقدروا يحصلوا على المطلب دا و عشان كدة دايما كنا بنضرب أمثلة ب إضراب عمال غزل المحلة و إضراب موظفين الضرائب العقارية " و تأكيدا لى مبدأ التحرك الجماعى الذى نعتبره الوسيلة الوحيدة لانتزاع الحقوق المسلوبة ....دعينا إلى المظاهرة اللى كننا دايما بنتكلم عنها " اصلا كل الرغى اللى فوق دا كان عشان ابدأ احكى عن المظاهرة بصراحة و اللى يظهر كدة إننى مش هارغى فيها أد ما الصور هى اللى هتقول " اتفقت إنى مش هارغى بس هقول شوية حاجات مهمة ...قبل المظاهرة ب يومين عملنا 3 معارض فى 3 أماكن مختلفة فى نفس الوقت و كانوا بجد من أنجح ما يمكن و كننا بندعوا فيهم الناس على المظاهرة و اليوم اللى قبل المظاهرة دخلنا ندوة كانت معمولة فى مدرج 3 بتاع علم نفس و دعونا كل الطلبة اللى حضروا الندوة انهم يشاركوا فى المظاهرة فى اليوم التالى ......نيجى بقى لى يوم المظاهرة , اتجمعنا عند مدرج 10 اللى هو المقر بتاعنا و قررنا ان المظاهرة تمشى من عندو لى حد باب الجامعة و بعد كدة نرجع تانى من قدام باب الجامعة لى حد مبنى الإدارة و بجد شارك فى المظاهرة ما لا يقل عن ثلاثة آلاف طالب و طالبة ..كلنا كنا بنطالب بحقنا , كلنا كنا بنرفض الظلم , كلنا كنا مش خايفين , كلنا فعلا كنا مــقـاومـــة.